താങ്കളുടെ നിർദ്ദേശങ്ങൾ അറിയിക്കൂ

മുംബൈയിലെ അധോലോക നായകനായ ഉസ്താദ് എന്നറിയപ്പെട്ട പരമേശ്വരൻ എല്ലാം അവസാനിപ്പിച്ച് നാട്ടിലേക്ക് മടങ്ങാൻ തീരുമാനിച്ചതിന്റെ ഭാഗമായി ബിസിനസ്‌ പാർട്ണറായ യൂസഫ് ഷായോട് തന്റെ ഓഹരി പിൻവലിക്കണമെന്ന കാര്യം അറിയിക്കുന്നു. എന്നാൽ ഒന്നും നൽകാൻ തയ്യാറാകാതിരുന്ന യൂസഫ് ഷായിൽ നിന്നും ബലപ്രയോഗത്തിലൂടെ തന്റെ ഓഹരി കൈപ്പറ്റിയ പരമേശ്വരൻ അതോടെ യൂസഫിന്റെ ശത്രുവായി മാറുന്നു.

നാട്ടിലെത്തിയ പരമേശ്വരൻ ഒരു സാധാരണ ബിസിനസുകാരനായും സഹോദരി പത്മജയുടെ പ്രിയപ്പെട്ട ജ്യേഷ്ഠനായും ജീവിക്കുകയും ശേഖരൻ എന്ന വ്യവസായിയുടെ മകൻ നന്ദനോടുള്ള പത്മജയുടെ പ്രണയമറിഞ്ഞ് അവരുടെ വിവാഹം നടത്തിക്കൊടുക്കുകയും ചെയ്യുന്നു.

ശേഖരന്റെ മരുമകനും വ്യവസായ പ്രമുഖനുമായ തമ്പിയുടെ കുബുദ്ധി ശേഖരന് ഭീമമായ കടബാധ്യതയുണ്ടാക്കുകയും അച്ഛനെ സഹായിക്കാനെന്ന വ്യാജേന പത്മജയിൽ നിന്നും തമ്പി സ്വത്തുക്കൾ എഴുതി വാങ്ങുകയും ചെയ്യുന്നു. പിന്നീട് പത്മജയെയും നന്ദനെയും തമ്പി കള്ളക്കേസിൽ അറസ്റ്റ് ചെയ്യിച്ചതോടെ പ്രകോപിതനായ പരമേശ്വരൻ തമ്പിയെ കീഴ്പ്പെടുത്തുകയും സത്യം തെളിയിക്കുകയും ചെയ്യുന്നു. തമ്പിയുടെയും യുസഫിന്റെയും പ്രതികാരനടപടികളെയെല്ലാം ചെറുത്ത അയാൾ തന്റെ സഹോദരിയുടെ ജീവന് യൂസഫ് ഭീഷണിയാകുമെന്നറിഞ്ഞതോടെ യൂസഫിനെ ഇല്ലായ്മ ചെയ്യാൻ തീരുമാനിക്കുന്നു.