താങ്കളുടെ നിർദ്ദേശങ്ങൾ അറിയിക്കൂ

സുധാകർ മംഗളോദയത്തിന്റെ "ശിശിരത്തിൽ ഒരു പ്രഭാതം" എന്ന റേഡിയോ നാടകത്തെ ആധാരമാക്കി നിർമ്മിച്ച ചിത്രം.

80-കളിലെ പോപ്പുലര്‍ താരങ്ങളായിരുന്ന മമ്മൂട്ടി, മോഹന്‍ലാല്‍, റഹ്മാന്‍ എന്നിവര്‍ ഈ ചിത്രത്തില്‍ ഒരുമിച്ചഭിനയിക്കുന്നു.

പ്രശസ്ത എഴുത്തുകാരനും സിനിമാ സംവിധായകനുമായ ഹരികൃഷ്ണന്‍ (മമ്മൂട്ടി)സ്വന്തം കോട്ടേജില്‍ വെച്ച് ദാരുണമായി കൊല്ലപ്പെട്ടതായി കാണുന്നു. അന്വേഷണച്ചുമതല ഡി വെ എസ് പി അച്യുതന്‍ കുട്ടി(മോഹന്‍ലാല്‍)ക്ക്. കൊല്ലപ്പെട്ട സ്ഥലത്തു നിന്നും ഒരു ലേഡീസ് കര്‍ച്ചീഫും ഒരു ലേഡീസ് ചെരുപ്പും ഡി വൈ എസ് പിക്കും സംഘത്തിനും ലഭിക്കുന്നു. കൊലപാതകി ഒരു സ്ത്രീയാണെന്ന ആദ്യ നിഗമനത്തില്‍ പോലീസ് സംഘം എത്തുന്നു. സംവിധായകന്റെ ഭാര്യ രാഗിണി(ജലജ)യെ ചോദ്യം ചെയ്യുന്നതോടെ കൊല്ലപ്പെട്ട ഹരികൃഷ്ണനു ഭാര്യ രാഗിണിയുമായി അത്ര നല്ല ദാമ്പത്യബന്ധമല്ലായിരുന്നു എന്നും സ്ത്രീകളോട് അഭിനിവേശമുള്ള ഹരികൃഷ്ണനു മുന്‍പ് ചില സ്ത്രീകളുമായി ബന്ധമുണ്ടായിരുന്നു എന്നും ഡി വൈ എസ് പി മനസ്സിലാക്കുന്നു. ഡി വൈ എസ് പിയും അനുജന്‍ അനില്‍കുമാറൂം(റഹ്മാന്‍) സുഹൃത്തുക്കളെപ്പോലെയാണ്. കേസിന്റെ വിശദാംശങ്ങള്‍ ഡി വൈ എസ് പി അനുജനുമായി പങ്കുവെക്കുന്നു. നഗരത്തിലെ ഒരു കോളേജ് വിദ്യാര്‍ത്ഥിനിയായ ശില്പ(കാര്‍ത്തിക) അനില്‍കുമാറിന്റെ കാമുകിയാണ്. ശില്പ ഹരികൃഷ്ണന്റെ വലിയൊരു ഫാനായിരുന്നു. അന്വേഷണത്തിന്റെ ഭാഗമായി ഹരികൃഷ്ണന്റെ പേര്‍സണല്‍ ഡയറിയില്‍ നിന്ന് ഡി വൈ എസ് പിക്കു ഒരു സ്ത്രീയുടേ ഫോട്ടൊ ലഭിക്കുന്നു. ഹരികൃഷ്ണന്റെ മുന്‍ ആത്മ സുഹൃത്ത് മേനോന്‍ (പ്രേം പ്രകാശ്) പറഞ്ഞ വിവരങ്ങള്‍ പ്രകാരം മുന്‍പ് കോളേജ് അദ്ധ്യാപികയും പിന്നീട് ഒരു ആശ്രമത്തിലെ അന്തേവാസിയായ പാര്‍വ്വതി (ഉണ്ണിമേരി) എന്ന ഭഗിനി സേവാമയി ആണ് ആ സ്ത്രീയെന്നു മനസ്സിലായ ഡി വൈ എസ് പി ആശ്രമത്തില്‍ വെച്ച് അവരെ ചോദ്യം ചെയ്തെങ്കിലും അവര്‍ സത്യങ്ങള്‍ ഒന്നും വെളിപ്പെടുത്തുന്നില്ല. അവരില്‍ സംശയം തോന്നിയ അവരെ പോലീസ് സംഘം അറസ്റ്റു ചെയ്യുന്നു. ഭഗിനിയെ അറസ്റ്റു ചെയ്ത വിവരം പത്രത്തിലൂടെ വായിച്ചറിഞ്ഞ ശില്പ ഭഗിനിയെ തനിക്കറിയാമെന്നും തന്റെ അമ്മ(ശ്രീപ്രിയ)യുടേ അടുത്ത കൂട്ടുകാരിയാണെന്നും ഡി വൈ എസ് പി അച്യുതമേനോനെ അറിയിക്കുന്നു. ശില്പയുമായി ഏറെ സംസാരിച്ച ഡി വൈ എസ് പിക്കു ശില്പ ഹരികൃഷ്ണന്റെ ഫാനായിരുന്നെന്നും ഹരികൃഷ്ണനുമായി ശില്പക്ക് വളരെ അടുത്ത ബന്ധമുണ്ടായിരുന്നെന്നും മനസ്സിലാക്കുന്നു. ശില്പ പറഞ്ഞ കാര്യങ്ങള്‍ പ്രകാരം ഡി വൈ എസ് പി ചില നിഗമനങ്ങളിലേക്കെത്തുകയും ചിലരെ സംശയത്തിന്റെ പേരില്‍ വിശദമായി ചോദ്യം ചെയ്യുകയും ചെയ്യുമ്പോള്‍ ഹരികൃഷ്ണനേയും അയാളുടെ മുന്‍ ജീവിതത്തെക്കുറിച്ചും വിശദമായ വിവരങ്ങളും കൊലപാതകത്തിലേക്ക് നയിച്ച കാരണങ്ങളും ഡി വൈ എസ് പിക്കു മനസ്സിലാവുന്നു. അതോടെ ചിലരെ അറസ്റ്റു ചെയ്യാനുള്ള നീക്കത്തിലാണ് ഡി വൈ എസ് പി അച്യുതമേനോനെ അത്ഭുതപ്പെടുത്തിക്കൊണ്ട് യഥാര്‍ത്ഥ കൊലായാളി രഹസ്യം വെളിവാക്കിക്കൊണ്ട് മുന്നിലെത്തുന്നത്...

സസ്പെന്‍സ് നിറഞ്ഞ ഇന്‍ വെസ്റ്റിഗേറ്റീവ് ത്രില്ലര്‍.