പി ഡേവിഡ്

തൃശ്ശൂർ ജില്ലയിലെ ചാലക്കുടിക്കടുത്ത് ആളൂരിൽ, പെരേപ്പാടൻ പൊറിഞ്ചുവിൻ്റെയും അച്ചാമ്മയുടേയും മകനായി 1942 ലാണ് പി. ഡേവിഡ് ജനിച്ചത്. എലിഞ്ഞിപ്ര സ്കൂളിൽ ആയിരുന്നു പ്രാഥമികവിദ്യാഭ്യാസം.

വളരെ ചെറുപ്പത്തിലെ ഫോട്ടോഗ്രാഫിയിൽ കമ്പമുണ്ടായിരുന്ന ഡേവിഡ് പഠനകാലത്ത് തന്നെ ഇരിങ്ങാലക്കുടയിലുള്ള ബന്ധുവിന്റെ പാട്ട്യാല സ്റ്റുഡിയോയിൽ സഹായിയായിരുന്നു. അവിടെനിന്നാണ്‌ ഛായാഗ്രഹണത്തിൻ്റെ ബാലപാഠങ്ങൾ അഭ്യസിക്കുന്നത്. പിന്നീട് ആലുവായിലെ ബാബൂസ് സ്റ്റുഡിയോയിൽ ചേർന്നു.

സംവിധായകനായ ജെ. ഡി. തോട്ടാൻ്റെ നിർദ്ദേശപ്രകാരം മദ്രാസിലെത്തിയ ഡേവിഡ്, ശാരദാ സ്റ്റുഡിയോയിൽ സഹായിയായി ജോലിയിൽ പ്രവേശിച്ചു. നിശ്ചലഛായാഗ്രാഹകനായ ശോഭനാ പരമേശ്വരൻ നായർ, ഫോട്ടോ പ്രോസസ് ചെയ്ത് ആൽബം ഉണ്ടാക്കുന്ന ചുമതല ഏൽപ്പിച്ചതോടെയാണ് ഇദ്ദേഹത്തിൻ്റെ സിനിമാജീവിതം ആരംഭിക്കുന്നത്. ശോഭനാ പരമേശ്വരൻ നായർക്ക് അസൗകര്യമുള്ള ദിവസങ്ങളിൽ ഡേവിഡ് സ്റ്റിൽ ഫോട്ടോഗ്രാഫറായും ജോലി നോക്കിയിരുന്നു. അമ്മയെക്കാണാൻ, ആദ്യകിരണങ്ങൾ തുടങ്ങിയ സിനിമകളിൽ പങ്കെടുക്കുന്നത് അങ്ങനെയാണ്.

എൻ. എൻ. പിഷാരടിയുടെ അമ്മു എന്ന ചിത്രത്തിലൂടെയാണ് ഇദ്ദേഹം സ്വതന്ത്ര നിശ്ചലഛായാഗ്രാഹകനാകുന്നത്.ഈ സിനിമയുടെ രണ്ടു ഘട്ടങ്ങൾ പിന്നിടുമ്പോഴാണ്, പി. എൻ. മേനോൻ സംവിധാനം ചെയ്ത റോസി എന്ന ചിത്രത്തിലേക്കു ക്ഷണം ലഭിക്കുന്നത്. അമ്മുവിൻ്റെ ഷൂട്ടിങ്ങ് നീണ്ടുപോയതിനാൽ റോസിയാണ് ആദ്യം പുറത്തിറങ്ങിയ സിനിമ.

150 മലയാളചിത്രങ്ങൾക്ക് പുറമേ തമിഴ്, തെലുങ്ക്, ഹിന്ദി എന്നീ ഭാഷാസിനിമകളിലും നിശ്ചലഛായാഗ്രഹണം നിർവഹിച്ചിട്ടുണ്ട്.

പി. എൻ. മേനോൻ, എ. വിൻസെന്റ്, രാമു കാര്യാട്ട്, കെ. എസ്. സേതുമാധവൻ, എം. ടി. വാസുദേവൻ നായർ, ഹരിഹരൻ, ശശികുമാർ, പത്മരാജൻ, ഭരതൻ, ഐ വി ശശി, ഫാസിൽ തുടങ്ങിയവരുടെ ചിത്രങ്ങളിൽ നിശ്ചലഛായാഗ്രാഹകനായി പ്രവർത്തിച്ചു.

ഭാര്യ അൽഫോൺസ. മക്കൾ: സജു, സിസിൻ

അവലംബം, ചിത്രം: ഫ്രെയിമുകൾക്കപ്പുറം - ഒരു സ്റ്റിൽ ഫോട്ടോഗ്രാഫറുടെ ആത്മകഥ.