താങ്കളുടെ നിർദ്ദേശങ്ങൾ അറിയിക്കൂ

മലയാള സിനിമയിലെ പ്രഗത്ഭരായ ഹരിഹരൻ, ഐ.വി. ശശി തുടങ്ങിയ സംവിധായകർക്കൊപ്പം എഴുപതുകളിൽ അസോസിയേറ്റ് ഡയറക്ടറായി പ്രവർത്തിച്ച് വലിയ അനുഭവസമ്പത്ത് നേടിയ വ്യക്തിയായിരുന്നു ശേഖർ കാവശ്ശേരി. വി. ശേഖരൻ കുട്ടി എന്നതായിരുന്നു അദ്ദേഹത്തിന്റെ യഥാർത്ഥ നാമം.

ഐ.വി. ശശിയുടെ 'അഭിനിവേശം', 'ആനന്ദം പരമാനന്ദം', 'ഇതാ ഒരു മനുഷ്യൻ', 'കരിമ്പന', 'ഇവർ' തുടങ്ങിയ ശ്രദ്ധേയമായ ചിത്രങ്ങളിലും ഹരിഹരന്റെ 'പൂമഠത്തെ പെണ്ണ്' എന്ന സിനിമയിലും അദ്ദേഹം അസോസിയേറ്റ് ഡയറക്ടറായി പ്രവർത്തിച്ചിട്ടുണ്ട്.

നീണ്ട കാലത്തെ സഹസംവിധാന അനുഭവങ്ങൾക്ക് ശേഷം 1978 ൽ അദ്ദേഹം സ്വതന്ത്ര സംവിധായകനായി ചുവടുവെച്ച ചിത്രമാണ് 'പഞ്ചപാണ്ഡവർ'. രാജേഷ് എന്ന പേരിൽ അദ്ദേഹം സംവിധാനം ചെയ്ത ഈ ബിഗ് ബജറ്റ് ചിത്രം പൂർണ്ണമായും ബോംബെയിലായിരുന്നു ചിത്രീകരിച്ചത്.

നടൻ ജയൻ വില്ലൻ വേഷങ്ങളിൽ നിന്ന് നായകനിരയിലേക്ക് ഉയർന്നു വരുന്ന കാലത്താണ് ഈ സിനിമ ഒരുങ്ങിയത്. ശ്രീകുമാരൻ തമ്പി രചിച്ച് എം.എസ്. വിശ്വനാഥൻ ഈണം നൽകിയ മനോഹരമായ ഗാനങ്ങൾ ഈ ചിത്രത്തിന്റെ പ്രത്യേകതയായിരുന്നു. സെൻസറിംഗ് കഴിഞ്ഞ് പോസ്റ്ററുകൾ വരെ പതിച്ച് റിലീസിന് തയ്യാറെടുത്തെങ്കിലും നിർമ്മാതാക്കൾ തമ്മിലുള്ള തർക്കം മൂലം സിനിമ പുറത്തിറങ്ങിയില്ല.

പ്രതീക്ഷയോടെ ഒരുക്കിയ ആദ്യ ചിത്രം പെട്ടിയിലായതോടെ അദ്ദേഹത്തിന്റെ സ്വതന്ത്ര സംവിധാന മോഹങ്ങൾക്ക് വലിയ തിരിച്ചടിയേറ്റു. നിലവിൽ ഈ സിനിമയുടെ പ്രിന്റുകൾ ലഭ്യമല്ലെങ്കിലും അതിലെ ഗാനങ്ങൾ ഇന്നും സംഗീതപ്രേമികൾക്കിടയിൽ നിലനിൽക്കുന്നു. 2024 ജനുവരി 8 ആം തിയ്യതി അദ്ദേഹം അന്തരിച്ചു.