SCP-966-2 (okodo pas infraroso filtro)
Mon-Numer: SCP-966
Xey-Klase: Ewklideli
Espesyal Proceso tem Inharegi: Harkaabil Ergomontim Ι-1 ("Royali Xikaryen") ji Harkaabil Ergomontim Ι-2 ("Hawali Takibuyen") pimpan xerca haberi tem abruto, bawlupul insanli morya fe awcudu fe somno, cel na ewreka ji morgi restane neninharedo unyen fe SCP-966.
Care nomune fe SCP-966 (tiga man ete namedo SCP-966-1, SCP-966-3 ji SCP-966-4, ji un fem te namedo SCP-966-2) cududo fal Establixey musi na beinhare in kamer fe 10 x 10 m kreado yon fuladi, koberido yon risasi, lokado in Dom-██. Dua anjenya-filmetul har infraroso filtro ji filme gancifil tem infraroso musi na beistala in kamer. Moyun nomune fe SCP-966 musi na beyamgi yon maso fe 20 kg fe moy mesi.
Fe kaso hu SCP-966-2 xengi, nerlelimo xen nomune musi na beestudi ji beawjeti leki te celidi censuya.
Tosifu: SCP-966 sen xikarfil bekreayen hu da sen sim kom belokal dari-andane insan ji suya lungo muka har munte har sudinosim denta. Per moyun hanta, ete hare lima daynakun hu da abil na hare lungoje fe maximum 20 cm. Fe hataya fe otosu tejamya, hin oto abil na asan bekasiru, ji kos to, oto sen nennasibu cel jento. Gaoje de SCP-966 sen intre 1.4 ji 1.6 metro, ji ete abil na celidi wazenje fe 30 kg. Jismuli, SCP-966 sen daif ji hare kavuke osto ji lil adolali mijuje. To no kwasisen ki ete rahatu yon somno; fe tayti, ete xa abruto esto moy harka fe kwasimo folxanseli watumon, ji xafe intre tiga ji lima minuto, ete xoru normapul ativoya.
SCP-966 sen okoible sol fe moja-lungoje fe intre 700 nm ji daju 900 nm. Hinto aplika moy jojiki de SCP-966. Eger etesu pifu, adola or organo xorhare yake fe duayum or tigayum daraje, efetodo perya xa sen okoible fe moja-lungoje fe intre 360 ji 900 nm.
SCP-966 yam mididay ji day hewan, fe inkludi fe insan. Ete xikar oro solo or kom duayen. Etesu metode fe duxikar sen na exizin un solo pom fe lelimo nenkonedo tipo fe moja (namedo moja ██████, cel na xerafu pasado Dotor ██████), hu da finikal bloki abilya de efetodo bekreayen na inidi somnoli fase VOH ji NVOH. Pia abilya na lilsomno besonxi. Efetopul telije de moja ██████ sen maximum 20 metro; hatali, jaribi onexa ki oto abil na bebloki fal xafealocune metal, espesyal risasi.
Moy xidu na kosa ki korbani de SCP-966 somno le possukses. Na inlide alo forma fe ixikalya haji sen ible, mas oto umumi sen sungayne tas efetodo jaribiyen koski oto no gongin real rahatu.
Xafe na awcudu somno de etesu korbani, SCP-966 xa folo etesu bexikaryen finki wala fe somno nenabilgi te. Fe hin fase, SCP-966 xa fronidi na yam te. SCP-966 le finsen daymo agil ji sotikal dur na folo etesu korbani. Dumarali, ete xa nyatupul fale tehdidune soti ner bexikaryen cel na estres te, ji ete hata ible jismuli atake te eger korbani finsen espesyalmo dureabil.
Maxus pimpan sintoma kosado fal awcudu fe somno, ban korbani le onexa ixara fe dusuferi kos supremmo luminpul alucina, ji pia abruto watumon fe daygadibuya har nil mimbay exli estimula. To nunli beimanu ki hinoto sen efeto fe godo kontato ton moja ██████. Seba hu kos da SCP-966 durepul exizin hin moja tas sol ban etesu korbani sen nenkonedo. Un hipotesis sen ki SCP-966 sol xa fale to denwatu hu te sen daymo yampeldo, koski to max nenfunsyongi jismuli ji sikoli jotay de bexikaryen, ji hinto nenabilgi te fe maxmo day velosije.
Neninharedo unyen fe SCP-966 loka wey total globa. Xorki ete le xorewreka fe nyan 19██, Establixey le sukses na daymo mingi etesu kwanti, fe hataya ki ete haji beewreka fe day kwanti in multi dexa, especifi █████ ji █████ ███████.
-
rating: 0
Credits
Makale: SCP-966
Eskriyen: Enma Ai
Asel To: https://scpwiki.com/scp-966
Basa-Taytiyen: oc3an oc3an
Imaje:Faylu-Name: Darkskullteeth infrared 1-new.png
Kreayen: stephlynch stephlynch
Izin-Doku: CC BY-SA 3.0
Mamba: Wiki fe Establixey SCP (Englisa)