شي جينپيڭ بانگلادەش زۇڭتۇڭى چۋپپۋمەن جۇڭگو مەن بانگلادەشتىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگىنىڭ 10 ـ ايدىڭ 4 ـ كۇنى بەيجيڭنەن بەرگەن حابارى. 10 ـ ايدىڭ 4 ـ كۇنى مەملەكەت ءتوراعاسى شي جينپيڭ بانگلادەش زۇڭتۇڭى چۋپپۋمەن ءوزارا قۇتتىقتاۋ تەلەگرامماسىن جولداپ، جۇڭگو مەن بانگلادەش ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن بانگلادەش ءداستۇرلى دوستار، جاقىن كورشىلەر، ەكى ەلدىڭ بارىس ـ كەلىسى ارىدان باستاۋ العان. ديپلوماتيالىق قارىم ـ قاتىناس ورناتقان جارتى عاسىردان بەرى، حالىقارالىق جانە وڭىرلىك جاعداي قالاي وزگەرسە دە، ەكى جاق باستان ـ اياق بەيبىت قاتار تۇرۋدىڭ بەس پرينسيبى نەگىزىندە دوستىق قارىم ـ قاتىناستى دامىتىپ، مەملەكەتتەر ارا ءوزارا قۇرمەت ەتۋدىڭ، تەڭ مامىلە جاساۋدىڭ، سەلبەسىپ تەڭ يگىلىككە كەنەلۋدىڭ تيپتىك ۇلگىسىن ورناتتى. بەرتىنگى جىلدارى جۇڭگو مەن بانگلادەشتىڭ ساياسي ءوزارا سەنىمدىلىگى ۇزدىكسىز بەكەمدەلىپ، "ءبىر بەلدەۋ، ءبىر جولدى" جوعارى ساپامەن بىرگە قۇرۋ، سونداي ـ اق ءار سالاداعى ناقتى ىستەر سەلبەستىگى ۇزدىكسىز كەڭەيىپ، جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسى ۇزدىكسىز تەرەڭدەدى.

شي جينپيڭ بىلاي دەپ باسا دارىپتەدى: مەن جۇڭگو - بانگلادەش قارىم ـ قاتىناسىنىڭ دامۋىنا ايرىقشا ءمان بەرەمىن، چۋپپۋ زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن وراي ەتىپ، ءداستۇرلى دوستىقتى اسقاقتاتىپ، ءوزارا پايدا جەتكىزۋ سەلبەستىگىن تەرەڭدەتىپ، بىرگە دامۋدى جەبەپ، ەكى ەل حالقىن اناعۇرلىم ويداعىداي باقىتقا كەنەلتىپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوسۋدى قالايمىن.

چۋپپۋ مىنالاردى ءبىلدىردى: وتكەن 50 جىلدان بەرى، بانگلادەش - جۇڭگو ەكى ەل ءوزارا قۇرمەت ەتۋ، ءوزارا سەنىم ارتۋ، باياندى سەلبەستىك جاساۋ نەگىزىندە تەرەڭ دوستىق سۇيىسپەنشىلىكتى بىرگە سومداپ، ەكى ەل حالقىنا شىنايى قۇت ـ ىرىس اكەلدى. بانگلادەش جاق جۇڭگو جاقتىڭ ءوڭىردىڭ بەيبىتشىلىگىن، ورنىقتىلىعىن جانە ورتاق گۇلدەنۋىن ىلگەرىلەتۋدە اتقارعان ماڭىزدى رولىن ايرىقشا القايدى، جۇڭگو جاقتىڭ ۇزاق ۋاقىتتان بەرى، بانگلادەش جاقتىڭ باياندى دامۋ ىستەرىنە كورسەتكەن قىمباتتى قولداۋىنا العىس ايتادى. ەكى ەل باسشىلارى مەن ەكى ەل حالقىنىڭ ورتاق قۇلشىنۋىندا ەكى ەل سەلبەستىگىنىڭ، ءسوز جوق، اناعۇرلىم مول ونىمدىلىككە يە بولاتىندىعىنا سەنەمىن.

سول كۇنى مەملەكەتتىك كەڭەستىڭ زۇڭليى لي چياڭ بانگلادەش ۋاقىتتىق ۇكىمەتىنىڭ باس اقىلشىسى يۇنۇسپەن ءوزارا قۇتتىقتاۋ تەلەگرامماسىن جولدادى. لي چياڭ مىنالاردى ءبىلدىردى: جۇڭگو جاق جۇڭگو - بانگلادەش قارىم ـ قاتىناسىنىڭ دامۋىنا ايرىقشا ءمان بەرەدى، بانگلادەش جاقپەن بىرگە قۇلشىنىپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن وراي ەتىپ، "ءبىر بەلدەۋ، ءبىر جولدى" جوعارى ساپامەن بىرگە قۇرۋدى، سونداي ـ اق ءار سالاداعى سەلبەستىكتى جەدەل ىلگەرىلەتىپ، جۇڭگو - بانگلادەش جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ ۇزدىكسىز دامۋىن ىلگەرىلەتۋدى قالايدى.

يۇنۇس مىنالاردى ءبىلدىردى: بانگلادەش پەن جۇڭگو ديپلوماتيالىق قارىم ـ قاتىناس ورناتقان 50 جىلدان بەرى، ەكى ەل حالقىنىڭ دوستىعى ۋاقىت وتكەن سايىن بەكەمدەلىپ، ەكى ەل قارىم ـ قاتىناسى ورنىقتى دامىپ، ەكى جاقتى سەلبەستىكتىڭ جەتىستىگى سۇبەلى بولدى، قۇتتىقتاۋعا تاتيدى. بانگلادەش جاق بانگلادەش پەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ اناعۇرلىم كوپ جەتىستىكتەرگە ۇزدىكسىز قول جەتكىزۋىن ىلگەرىلەتۋگە كۇش سالادى.