شي جينپيڭ سينگاپۋر زۇڭتۇڭى شاڭدامانمەن جۇڭگو مەن سينگاپۋردىڭ ديپلوماتيالىق قارىم ـ قاتىناس ورناتقاندىعىنىڭ 35 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگىنىڭ 10 ـ ايدىڭ 3 ـ كۇنى بەيجيڭنەن بەرگەن حابارى. 10 ـ ايدىڭ 3 ـ كۇنى مەملەكەت ءتوراعاسى شي جينپيڭ سينگاپۋر زۇڭتۇڭى شاڭدامانمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 35 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن سينگاپۋر ءوزارا دوس كورشىلەر جانە ماڭىزدى سەلبەستىك سەرىكتەر. ديپلوماتيالىق قارىم ـ قاتىناس ورناتقان 35 جىلدان بەرى، ەكى ەل ءوزارا قۇرمەت ەتۋگە، ءوزارا سەنىم ارتۋعا، سەلبەسىپ تەڭ يگىلىككە كەنەلۋگە تاباندى بولدى، ەكى جاقتى قارىم ـ قاتىناستىڭ ۇزدىكسىز ساپاسى جوعارىلاپ، دارەجەسى ءوسىرىلدى، ءار سالاداعى سەلبەستىكتە سۇبەلى جەتىستىكتەرگە قول جەتكىزدى. ەكى جاق وزدەرىنىڭ وسىزاماندانۋىن ىلگەرىلەتۋ بارىسىندا قول ۇستاسا العا باسىپ، ەكى ەل حالقىنا ناقتى پايدا جەتكىزدى.

شي جينپيڭ بىلاي دەپ باسا دارىپتەدى: جۇڭگو جاق سينگاپۋر جاقپەن ديپلوماتيالىق قارىم ـ قاتىناس ورناتقاندىعىنىڭ 35 جىلدىعىن وراي ەتىپ، ساياسي ءوزارا سەنىمدىلىكتى اناعۇرلىم تەرەڭدەتىپ، جوعارى دەڭگەيدەگى سەلبەستىكتى ىلگەرىلەتىپ، گۋمانيتارلىق اۋىس ـ كۇيىستى جيىلەتىپ، كوپ جاقتى ساۋدا ءتۇزىلىسى مەن حالىقارالىق قارىم ـ قاتىناس نەگىزگى ولشەمىن بىرگە قورعاپ، جۇڭگو مەن سينگاپۋردىڭ جان ـ جاقتى، جوعارى ساپالى، كورەگەندىككە يە سەرىكتەستىك قارىم ـ قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتىپ، ءوڭىردىڭ جانە دۇنيە ءجۇزىنىڭ بەيبىتشىلىگىنە، گۇلدەنىپ ـ كوركەيۋىنە اناعۇرلىم زور ۇلەس قوسۋدى قالايدى.

شاڭدامان مىنالاردى ءبىلدىردى: 2023 ـ جىلى سينگاپۋر مەن جۇڭگونىڭ قارىم ـ قاتىناسى جان ـ جاقتى، جوعارى ساپالى، كورەگەندىككە يە سەرىكتەستىك قارىم ـ قاتىناس دەڭگەيىنە كوتەرىلدى. ەكى ەل ۇكىمەتتەرى اراسىنداعى سەلبەستىك نىساندارى ۇزدىكسىز ىلگەرىلەتىلىپ، ۇزدىكسىز جاڭا ەرەكشەلىك قوسىلىپ، كورەگەندىك ايگىلەندى. ەكى جاق ءداۋىردىڭ دامۋ تالابىنا سايكەسىپ، جاڭا سالاداعى سەلبەستىكتى بەلسەنە كەڭەيتىپ، ەكى ەل حالىق جۇرتشىلىعىنىڭ گۋمانيتارلىق دانەكەرىن ۇزدىكسىز نىعايتتى. مەن سينگاپۋر - جۇڭگو ەكى ەلدىڭ ۇزدىكسىز تىعىز سەلبەسىپ، ەكى جاقتى قارىم ـ قاتىناستىڭ تىڭ دەڭگەيگە كوتەرىلۋىن ىلگەرىلەتەتىندىگىنە كامىل سەنەمىن.

سول كۇنى مەملەكەتتىك كەڭەستىڭ زۇڭليى لي چياڭ سينگاپۋر زۇڭليى حۋاڭ شۇنسايمەن ءوزارا قۇتتىقتاۋ تەلەگرامماسىن جولدادى. لي چياڭ مىنالاردى ءبىلدىردى: جۇڭگو جاق سينگاپۋر جاقپەن دامۋ ستراتەگياسىن ءتۇيىلىستىرۋدى اناعۇرلىم كۇشەيتىپ، ءتۇرلى سالاداعى جوعارى دەڭگەيدەگى سەلبەستىكتى تەرەڭدەتىپ، كوپ جاقتى ساۋدا ءتۇزىلىسىن قول ۇستاسا قورعاپ، ەكى ەلدىڭ ءوز ەلىنىڭ دامۋى مەن ءوز ءوڭىرىنىڭ گۇلدەنىپ ـ كوركەيۋىنە، ورنىقتىلىعىنا دەم بەرۋدى قالايدى.

حۋاڭ شۇنساي مىنالاردى ءبىلدىردى: كوپ جىلدان بەرى سينگاپۋر - جۇڭگو قارىم ـ قاتىناسى ۇزدىكسىز تەرەڭدەپ، جوعارى دەڭگەيدە ءوزارا سەنىمدىلىك ورناتتى. سينگاپۋر جاق جۇڭگو جاقپەن ءار سالاداعى سەلبەستىكتى ۇزدىكسىز كەڭەيتىپ، ەركىن ساۋدا مەن كوپ جاقتى جۇيەنى بىرگە قورعاۋدى قالايدى.