قۇربانداردى ەسكە الۋ كۇنى حالىق قاھارماندارىنا گۇل شارباق تارتۋ ەتۋ سالتى بەيجيڭدە سالتاناتپەن وتكىزىلدى

9 - ايدىڭ 30 - كۇنى تۇستەن بۇرىن پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار بەيجيڭ تيان - انمىن الاڭىنا كەلىپ، قۇربانداردى ەسكە الۋ كۇنى حالىق قاھارماندارىنا گۇل شارباق تارتۋ ەتۋ سالتىنا قاتىناستى. سۋرەتتە: شي جينپيڭ گۇل شارباقتىڭ تورعىن لەنتاسىن رەتتەۋدە.

□しろいしかく سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

9 - ايدىڭ 30 - كۇنى تۇستەن بۇرىن پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار بەيجيڭ تيان - انمىن الاڭىنا كەلىپ، قۇربانداردى ەسكە الۋ كۇنى حالىق قاھارماندارىنا گۇل شارباق تارتۋ ەتۋ سالتىنا قاتىناستى.

□しろいしかく سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگىنىڭ 9 ـ ايدىڭ 30 ـ كۇنى بەيجيڭنەن بەرگەن حابارى. قاھارمان قۇربانداردىڭ ەڭبەگىن ەستە بەرىك ساقتاپ، كۇرەس جۇرگىزۋ رۋحىن شىڭداۋ كەرەك. قۇربانداردى ەسكە الۋ كۇنى حالىق قاھارماندارىنا گۇل شارباق تارتۋ ەتۋ سالتى 9 ـ ايدىڭ 30 ـ كۇنى تۇستەن بۇرىن بەيجيڭ تيان ـ انمىن الاڭىندا سالتاناتپەن وتكىزىلدى. پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ءار سالا ۋاكىلدەرىمەن بىرگە سالتقا قاتىناستى.

ايبىندى تيان ـ انمىن الاڭىندا بەس جۇلدىزدى نارت قىزىل تۋ بيىك جەلبىرەپ، حالىق قاھارماندارى ەسكەرتكىشى اسقاق بوي سوزىپ تۇر. الاڭ ورتالىعىندا "وتانعا باقىت تىلەيمىز" دەگەن جازۋ بار الىپ گۇل شارباق وتاننىڭ گۇلدەنىپ ـ كوركەيۋى جونىندەگى تاماشا تىلەكتى بەينەلەپ تۇر. ەسكەرتكىشتىڭ سولتۇستىك جاعىنداعى ەكى قاتار گۇل تەكشەسىنە بايجۇي سياقتى گۇلدەردەن قۇرالعان 18 گۇل ساقيناسى بۇكىل جۇڭحۋا پەرزەنتتەرىنىڭ قاھارمان قۇرباندارعا تەرەڭ ساعىنىشىن ايگىلەپ تۇر.

ساعات 10عا تاياعاندا شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلى پارتيا مەن مەملەكەت باسشىلارى تيان ـ انمىن الاڭىنا كەلىپ، حالىق قاھارماندارىنا گۇل شارباق تارتۋ ەتۋ سالتىنا قاتىناستى.

جۇڭگو حالىق ازاتتىق ارمياسى اسكەري وركەسترىنىڭ كىشى كەرنايشىلارى مۇڭلى ءارى سارىندى «قۇربانداردى ەسكە الۋ كۇنى كەرناي كۇيىن» تارتتى.

"قۇرمەت قاراۋىلدارى، دايىندال"! بۇيرىق بەرىلىسىمەن ءۇش ارميانىڭ قۇرمەت قاراۋىلدارى نىق قاداممەن ارشىنداي ءجۇرىپ، قۇرمەت قاداممەن ەسكەرتكىشتىڭ الدىنا بارىپ، مىلتىقتارىن سەرت ۇستاپ تۇردى.

ساعات ءدال 10دا حالىق قاھارماندارىنا گۇل شارباق تارتۋ ەتۋ سالتى رەسمي باستالدى. اسكەري وركەستر «ەرىكتىلەر مارشىن» ورىندادى، بۇكىل الاڭداعىلار بىركەلكى داۋىسپەن جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.

مەملەكەت ءانى ورىندالىپ بولعان سوڭ، بۇكىل الاڭداعىلار جىم ـ جىرت كۇيگە شومىپ، جۇڭگو حالقىنىڭ ازاتتىق ىستەرى مەن رەسپۋبليكانىڭ قۇرىلىس ىستەرى جولىندا ەرلىكپەن ءومىرىن ارناعان قۇرباندارعا ءۇنسىز ازا ءبىلدىردى.

ءۇنسىز ازا ءبىلدىرۋ اياقتالعاننان كەيىن، قولدارىنا گۇل ۇستاعان جاسوسپىرىمدەر حالىق قاھارماندارى ەسكەرتكىشىنە قاراپ تۇرىپ، «ءبىز كوممۋنيزم ءىزباسارلارىمىز» ءانىن اسقاقتاتا شىرقادى ءارى پيونەرلەر وتريادىنىڭ سالەمىن جاسادى.

شارشى توپتىڭ الدىندا جۇڭگو كوممۋنيستىك پارتياسى ورتالىق كوميتەتى، مەملەكەتتىك حالىق قۇرىلتايى تۇراقتى كوميتەتى، مەملەكەتتىك كەڭەس، مەملەكەتتىك ساياسي كەڭەس، ورتالىق اسكەري ىستەر كوميتەتى، دەموكراتيالىق پارتيا ـ توپتار، مەملەكەتتىك ساۋدا ـ ونەركاسىپشىلەر بىرلەستىگى جانە پارتيادا، توپتا جوق وتانشىل قايراتكەرلەر، حالىقتىق ۇيىمدار مەن ءار سالا جۇرتشىلىعى، ساقا جاۋىنگەرلەر، ساقا جولداستار جانە قۇربانداردىڭ تۋىس ـ تۋعاندارى، جۇڭگو پيونەرلەر وتريادى اتىنان تارتۋ ەتىلگەن 9 ۇلكەن گۇل شارباق رەتىمەن قويىلدى، گۇل شارباقتاردىڭ قىزىل تورعىن لەنتاسىنا جازىلعان "حالىق قاھارماندارى ماڭگى جاسايدى" دەگەن جازۋلار ەرەكشە كوز تارتىپ تۇردى.

اسكەري وركەستر تەرەڭ سۇيىسپەنشىلىككە تولى «گۇل تارتۋ ەتۋ مۋزيكاسىن» ورىندادى، 18 قۇرمەت قاراۋىلى گۇل شارباقتاردى بايىپپەن كوتەرىپ، حالىق قاھارماندارى ەسكەرتكىشىنە قاراي باياۋ قادام تاستاپ، گۇل شارباقتاردى ەسكەرتكىشتىڭ تۇعىرىنا اكەلىپ قويدى.

شي جينپيڭ قاتارلى پارتيا مەن مەملەكەت باسشىلارى ەسكەرتكىش تۇعىرىنا شىعىپ، گۇل شارباقتاردىڭ الدىندا كىدىرىپ، كوز الماي قارادى. قۇلپىرعان حۇڭجاڭ، جايقالا اشىلعان لالاگۇل، حوش ءيىستى ۋىنشينلان گۇلدەرى حالىق قاھارماندارىنا دەگەن تەرەڭ ساعىنىش پەن وسكەلەڭ قۇرمەتتى ايگىلەۋدە.

شي جينپيڭ الدىعا ءجۇرىپ بارىپ، گۇل شارباقتىڭ تورعىن لەنتاسىن ىجداعاتپەن رەتتەدى. وسىدان كەيىن شي جينپيڭ قاتارلى پارتيا مەن مەملەكەت باسشىلارى باياۋ قاداممەن اينالىپ، حالىق قاھارماندارى ەسكەرتكىشىنە قۇرمەتپەن كوز تاستادى.

بيىل — جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى. 80 جىلدىڭ الدىندا جۇڭگو حالقى اسا ماشاقاتپەن قان كەشىپ شايقاس جاساۋ ارقىلى تاياۋ زاماننان بەرگى سىرتقى جاۋدىڭ شاپقىنشىلىعىنا قارسى تۇرۋداعى تۇڭعىش رەتكى تولىق جەڭىسكە قول جەتكىزىپ، جۇڭحۋا ۇلتىنىڭ ۇلى گۇلدەنۋىنىڭ نۇرلى بولاشاعىن اشتى. بۇگىن شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، بۇكىل پارتيا، بۇكىل ارميا، بۇكىل ەلدەگى ءار ۇلت حالقى جاپون شاپقىنشىلارىنا قارسى سوعىس ۇلى رۋحىن جالعاستىرىپ جانە اسقاقتاتىپ، اسقاق جىگەرمەن قايراتتانا ۇمتىلىپ، ەرلىكپەن العا ىلگەرىلەپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋدە.

جاسوسپىرىمدەردىڭ جانە ءار سالا جۇرتشىلىعىنىڭ ۋاكىلدەرى دە رەتىمەن ەسكەرتكىشتىڭ الدىنا بارىپ، قولدارىنداعى گۇلدەرىن تارتۋ ەتتى ءارى ەسكەرتكىشكە قۇرمەتپەن كوز تاستادى.

گۇل شارباق تارتۋ ەتۋ سالتىن جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، بەيجيڭ قالالىق پارتكومنىڭ شۋجيى يىن لي باسقاردى.

بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ءبىر ءبولىم ورىنباسار باستىقتارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ءبىر ءبولىم ورىنباسار ءتوراعالارى جانە ورتالىق اسكەري ىستەر كوميتەتىنىڭ مۇشەلەرى سالتقا قاتىناستى.

ورتالىقتاعى پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنىڭ جانە بەيجيڭ قالاسىنىڭ نەگىزگى جاۋاپتى جولداستارى، ءارقايسى دەموكراتيالىق پارتيا ـ توپتاردىڭ ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، بەيجيڭدەگى ساقا جاۋىنگەرلەردىڭ، ساقا جولداستاردىڭ جانە قۇربانداردىڭ تۋىس ـ تۋعاندارىنىڭ ۋاكىلدەرى، بەيجيڭدەگى ەڭبەك ءسىڭىرىپ، داڭققا يە بولىپ ماداقتالىپ ـ سيلانعانداردىڭ ۋاكىلدەرى، استاناداعى ءار سالا جۇرتشىلىعىنىڭ ۋاكىلدەرى قاتارلىلار دا سالتقا قاتىناستى.