شي جينپيڭ شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ ادەبيەت - كوركەمونەر ساۋىق كەشى «كورىكتى شينجياڭدى» تاماشالادى

«حالىق گازەتى»، 9 - ايدىڭ 24 - كۇنى، ءۇرىمجى. 9 - ايدىڭ 24 - كۇنى كەشتە ءۇرىمجى مادەنيەت ورتالىعىنىڭ ۇلكەن تەاترحاناسى دۋماندى مەرەيگە شومدى. شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ ادەبيەت - كوركەمونەر ساۋىق كەشى «كورىكتى شينجياڭ» وسى ارادا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شينجياڭ ۇيعۇر اۆتونوميالى رايونىنداعى ءار ۇلت حالقىمەن بىرگە ساۋىق كەشتى تاماشالادى.

ادەبيەت - كوركەمونەر ساۋىق كەشى ءان ايتىپ، ءبي بيلەگەن «ءبىز بىرگە بولايىق» اتتى نومىرمەن شىمىلدىعىن اشتى. ويىن ءۇش بولىمنەن تۇرادى. 1 - ءبولىمى «جەڭىس جىرىن شينجياڭعا جەتكىزۋ»، «بارابان سوعىپ ءان ايتۋ»، «جالىندى جىلدار» سياقتى ءان - بيلەرمەن شينجياڭنىڭ سوتسياليستىك قۇرىلىسىنىڭ دۋماندى كورىنىسىن ايگىلەسە؛ 2 - بولىمىندە كورىنىستىك ءان - ءبي «تيانشاننىڭ تۇستىگى مەن تەرىستىگى»، ءان - ءبي «تيانشان قاراعايلارى تامىرلاس»، «رەفورما جاساپ، ەسىك اشۋ جاقسى» ءانىن ورىنداپ، رەفورما جاساۋدىڭ، ەسىك اشۋدىڭ شينجياڭعا اكەلگەن جالىندى ومىرشەڭدىك كۇشىن بەينەلەدى؛ 3 - بولىمىندە "ەرەكشە قامقورلىق»، «قام جەۋ»، «سۇيىسپەنشىلىگىمدى وتان اناما ارنايمىن»، «تيانشاندى قورعاۋ»، «جىبەك جولىندا اشىلعان گۇل»، «ءداۋىر سيمفونياسى» سياقتى نومىرلەردە شينجياڭداعى ءار ۇلت ۇلاندارىنىڭ ءبىر نيەتپەن ارمانعا قانات قاعۋىنىڭ جاڭا ءداۋىرىنىڭ كوركەم كارتيناسى كەسكىندەلدى. «كورىكتى شينجياڭ» اتتى ءان - ءبي ساۋىق كەشتى جوعارى ورلەۋگە كوتەردى. ساۋىق كەشتىڭ سۇيىسپەنشىلىگى قويۋ، تارتىمدىلىعى كۇشتى بولىپ، شينجياڭ ۇيعۇر اۆتونوميالى رايونىنىڭ 70 جىلدان بەرگى شۇعىلالى بارىسىن ايگىلەپ، شينجياڭداعى ءار ۇلت كادرلارى مەن بۇقاراسىنىڭ باس شۋجيگە دەگەن سۇيىسپەنشىلىگىن، پارتيا مەن مەملەكەتكە دەگەن العىس سەزىمىن، باقىتتى تۇرمىسقا دەگەن قۋانىش سەزىمىن بەينەلەدى.

ۋاڭ حۋنيڭ، ساي چي، لي گانجيە، حى ليفىڭ، ۋاڭ شياۋحۇڭ، شوكىرات زاكىر، چىن ي - چين، ۋاڭ دۇڭفىڭ جانە ليۋ جىنلي، شينجياڭدا قىزمەت ىستەگەن ساقا جولداستار، سونداي - اق ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، ورتالىق ۋاكىلدەر ۇيىرمەسىنىڭ بارلىق مۇشەلەرى ساۋىق كەشىن بىرگە تاماشالادى.