شي جينپيڭ ۇرىمجىگە جەتتى

9 - ايدىڭ 23 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ قيمىلىنا قاتىناسۋ ءۇشىن ورتالىق ۋاكىلدەر ۇيىرمەسىن باستاپ ارناۋلى ۇشاقپەن ۇرىمجىگە جەتتى. سۋرەتتە: شي جينپيڭ قارسى العان بۇقاراعا قول بۇلعاپ قۇرمەت بىلدىرۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 9 - ايدىڭ 23 - كۇنى، ءۇرىمجى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ورتالىق ۋاكىلدەر ۇيىرمەسىن باستاپ شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ قيمىلىنا قاتىناسۋ ءۇشىن 9 - ايدىڭ 23 - كۇنى تۇستەن كەيىن ارناۋلى ۇرىمجىگە جەتتى. شي جينپيڭنىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى رەتىندە ورتالىق ۋاكىلدەر ۇيىرمەسىن باستاپ شينجياڭعا بارىپ، شينجياڭ ۇيعۇر اۆتونوميالى رايونىنىڭ قۇرىلعاندىعىن قۇتتىقتاۋ قيمىلىنا قاتىناسۋى پارتيا مەن مەملەكەت تاريحىندا تۇڭعىش رەت، بۇل پارتيا ورتالىق كوميتەتىنىڭ شينجياڭ قىزمەتىنە ايرىقشا ءمان بەرەتىندىگىن، شينجياڭداعى ءار ۇلت كادرلارىنا، بۇقاراسىنا ىقىلاستى قامقورلىعىن تولىق ايگىلەيدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى، ورتالىق ۋاكىلدەر ۇيىرمەسىنىڭ باستىعى ۋاڭ حۋنيڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي سول ۇشاقپەن جەتتى.

التىن كۇزدە شينجياڭنىڭ بايتاق دالاسىنان مول ءونىم شاتتىعى ەسەدى. ءۇرىمجى تيانشان حالىقارالىق اۋەجايىندا بارابان ءۇنى كوكتى جاڭعىرتىپ، دۋماندى بەينەگە شومدى.

ساعات 14 تەن 20 مينۋت وتكەندە شي جينپيڭ وتىرعان ارناۋلى ۇشاق تيانشان حالىقارالىق اۋەجايىنا قوندى، ۇشاق الاڭقىسىندا كۇتىپ تۇرعان شينجياڭداعى ءار ۇلت، ءار سالا بۇقاراسى ىستىق ىقىلاسپەن الاقايلادى. شي جينپيڭ ۇشاق ەسىگىنەن شىعىپ، قارسى الىپ تۇرعان بۇقاراعا قول بۇلعاپ قۇرمەت ءبىلدىردى.

شينجياڭ ۇيعۇر اۆتونوميالى رايوندىق پارتكومنىڭ شۋجيى چىن شياۋجياڭ، اۆتونوميالى رايوندىق حالىق ۇكىمەتىنىڭ ءتوراعاسى ەركىن تۇنياز، اۆتونوميالى رايوندىق حالىق قۇرىلتايى تۇراقتى كوميتەتىنىڭ مەڭگەرۋشىسى ءزۇمىرات وبۇل، اۆتونوميالى رايوندىق ساياسي كەڭەستىڭ ءتوراعاسى نۇرلان ءابىلماجىن، شينجياڭ ءوندىرىس - قۇرىلىس بيڭتۋانىنىڭ جىڭۋيى حى جۇڭيوۋ قاتارلىلار ۇشاق باسپالداعىنىڭ جانىندا كۇتىپ تۇردى. شي جينپيڭ ۇشاق باسپالداعىنان تۇسكەندە، پيونەر وقۋشى گۇل ۇسىندى. ءار ۇلت بۇقاراسىنىڭ ۋاكىلدەرى ۇلتتىق كيىم كيىپ، ءان ايتىپ، ءبي بيلەپ، باس شۋجيدىڭ كەلگەنىن قارسى الىپ، باس شۋجيگە دەگەن شىنايى تىلەگىن ءبىلدىردى.

ءۇرىمجى قالاسى مەرەكە شاتتىعىنا شومدى. اۋەجايدان قونالقى ورىنعا دەيىنگى نەگىزگى كوشەلەردىڭ ەكى جاعىندا گۇل - بايشەشەك قۇلپىرىپ، ءتۇستى تۋلار جەلبىرەپ، ءار ۇلت بۇقاراسى قولدارىنا قىزىل تۋ ۇستاپ، بىركەلكى الاقايلاپ، قارسى الۋ جانە العىس ايتۋ سەزىمىن ءبىلدىردى. شي جينپيڭ جول بويىنداعى بۇقاراعا ءالسىن - ءالى قول بۇلعاپ، ىقىلاسپەن قۇرمەت ءبىلدىردى.

ورتالىق ۋاكىلدەر ۇيىرمەسى باستىعىنىڭ ورىنباسارى مىندەتىندەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت بىرلىكساپ ءبولىمىنىڭ باستىعى لي گانجيە، مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارى شوكىرات زاكىر، مەملەكەتتىك كەڭەستىڭ مۇشەسى چىن ي - چين، مەملەكەتتىك ساياسي كەڭەس ءتوراعاسىنىڭ ورىنباسارى ۋاڭ دۇڭفىڭ، ورتالىق اسكەري ىستەر كوميتەتىنىڭ مۇشەسى ليۋ جىنلي، سەرىك بولىپ قيمىلعا قاتىناساتىن جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسارى حى ليفىڭ، جۇڭگو كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، مەملەكەتتىك كەڭەستىڭ مۇشەسى ۋاڭ شياۋحۇڭ قاتارلىلار سول ۇشاقپەن جەتتى.

ورتالىق ۋاكىلدەر ۇيىرمەسىنىڭ مۇشەلەرى ءبىر ۋاقىتتا جەتتتى، ولار ورتالىق پەن مەملەكەت ورگاندارىنىڭ قاتىستى تاراۋلارىنىڭ، ارميانىڭ قاتىستى ورىندارىنىڭ، ىشكى موڭعۇل، گۋاڭشي، شيزاڭ، نيڭشيا سىندى 4 اۆتونوميالى رايوننىڭ جانە شينجياڭعا باعىتتامالى كومەكتەسەتىن قاتىستى ولكە، قالالاردىڭ جاۋاپتى جولداستارى قاتارلىلاردى قامتيدى.