شي جينپيڭ چاۋشياننىڭ مەملەكەت مەرەكەسىنىڭ 77 جىلدىعى بايلانىسىمەن چاۋشياننىڭ ەڭ جوعارى باسشىسى جين جىڭىنعا قۇتتىقتاۋ تەلەگرامماسىن جولدادى

شينحۋا اگەنتتىگى، 9 - ايدىڭ 9 - كۇنى، بەيجيڭ. 9 - ايدىڭ 9 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ چاۋشياننىڭ مەملەكەت مەرەكەسىنىڭ 77 جىلدىعى بايلانىسىمەن چاۋشيان ەڭبەك پارتياسىنىڭ باس شۋجيى، مەملەكەت ىستەرى كوميتەتىنىڭ باستىعى جين جىڭىنعا قۇتتىقتاۋ تەلەگرامماسىن جولدادى.

شي جينپيڭ بىلاي دەپ اتاپ كورسەتتى: 77 جىلدان بەرى چاۋشيان ەڭبەك پارتياسى چاۋشيان حالقىن ىنتىماقتاستىرىپ جانە باستاپ، قاجىماي - تالماي العا باسىپ، چاۋشياننىڭ سوتسياليستىك ىستەرىنىڭ ۇزدىكسىز دامۋىن ىلگەرىلەتتى. تاياۋ جىلدارى باس شۋجي جولداس باستاعان چاۋشيان ەڭبەك پارتياسىنىڭ باسشىلىعىندا، چاۋشيان حالقى چاۋشيان ەڭبەك پارتياسىنىڭ 8 - قۇرىلتايىندا العا قويىلعان نىسانا - مىندەتتەردى تولىق ورىنداۋ جولىندا قۇلشىنا كۇرەس جۇرگىزىپ، كوپتەگەن قۋانارلىق تابىستارعا قول جەتكىزدى. چاۋشيان حالقىنىڭ، ءسوز جوق، اسقاق رۋحپەن جانە كورنەكتى ناتيجەمەن چاۋشيان ەڭبەك پارتياسى 9 - قۇرىلتايىنىڭ اشىلۋىن قارسى الىپ، چاۋشيان ۇلگىسىندەگى سوتسياليستىك قۇرىلىس ىستەرىنىڭ تىڭ پاراعىن اشاتىندىعىنا سەنەمىن.

شي جينپيڭ بىلاي دەپ باسا دارىپتەدى: جۇڭگو مەن چاۋشيان − تاۋ - وزەنى جالعاسقان ءداستۇرلى دوس كورشىلەر. جۇڭگو - چاۋشيان قارىم - قاتىناسىن ويداعىداي قورعاۋ، ويداعىداي بەكەمدەۋ، ويداعىداي دامىتۋ باستان - اياق جۇڭگو پارتياسى مەن ۇكىمەتىنىڭ بۇلجىماس ستراتەگيالىق باعىتى سانالادى. بىرنەشە كۇننىڭ الدىندا باس شۋجي جولداس جۇڭگوعا كەلىپ جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناستى، مەن سىزبەن تاعى دا كەزدەسىپ، ەكى پارتيا، ەكى ەل قارىم - قاتىناسىنىڭ دامۋ جوباسىن بىرگە جوبالادىم. جۇڭگو جاق چاۋشيان جاقپەن ستراتەگيالىق قارىم - قاتىناستى كۇشەيتىپ، بارىس - كەلىستى، سەلبەستىكتى جيىلەتىپ، جۇڭگو مەن چاۋشياننىڭ دوستىعىن جانە ەكى ەلدىڭ سوتسياليزم ىستەرىن قول ۇستاسا ىلگەرىلەتىپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوسۋدى قالايدى.

كەلۋ قاينارى: حالىق تورابى