ഇലക്ട്ര

• ബോളിവുഡ് നടി മനീഷ കൊയ് രാള, തമിഴ് നടൻ പ്രകാശ് രാജ്, മലയാളത്തിൽ തുടക്കം കുറിച്ച് പിന്നീട് തമിഴ് സിനിമയിൽ സജീവമായ നയൻ താര എന്നിവർ ഈ സിനിമയിലെ പ്രധാന വേഷങ്ങൾ കൈകാര്യം ചെയ്യുന്നു.

• ഹിന്ദി സിനിമയിലെ പ്രമുഖ ഛായാഗ്രാഹകൻ സനു ജോൺ വർഗ്ഗീസാണു ഈ ചിത്രത്തിന്റെ ഛായാഗ്രഹണം.
• നിരവധി ഫെസ്റ്റിവലുകളിൽ നിരവധി പുരസ്കാരങ്ങളും നിരൂപക ശ്രദ്ധയും നേടി 2010 ൽ പൂർത്തിയായ ഈ ചിത്രം 2016 ലാണ് റിലീസ് ചെയ്തത്

മധ്യ തിരുവിതാംകൂറിലെ തിരുവല്ല ഭാഗത്തെ ‘അമരത്ത്’ തറവാടിനെ കേന്ദ്രീകരിച്ചാണു സിനിമയുടെ മുഖ്യപ്രമേയത്തിന്റെ പശ്ചാത്തലഭൂമിക. തിരുവല്ലയിലെ പ്ലാന്ററായ എബ്രാഹാമിന്റെ (പ്രകാശ് രാജ്) തറവാടാണു അമരത്ത് തറവാട്. എബ്രഹാമിനും ഭാര്യ ഡയാന(മനീഷ കൊയ് രാള) യ്ക്കും രണ്ടു മക്കൾ എഡിനും ഇലക്ട്ര(നയൻ താര)യും.

എഡ്വിൻ അമ്മയുടെ മകനായിരുന്നെങ്കിൽ ഇലക്ട്ര അപ്പന്റെ മകളായിരുന്നു. ഇലക്ട്രയ്ക്ക് അപ്പനോടായിരുന്നു സ്നേഹവും അടുപ്പവും കൂടുതൽ. അപ്പനോട് കടുത്ത ഭക്തിയും കടപ്പാടും വിധേയത്വവും തീവ്ര സ്നേഹവും ഇലക്ട്രയ്ക്കുണ്ടായിരുന്നു. എന്നാൽ ഒരു പ്രത്യേക സാഹചര്യത്തിൽ വിദ്വേഷം, ചതി, പ്രതികാരം, പ്രണയം എന്നീ വികരങ്ങൾ അമരത്ത് തറവാട്ടിലെ അംഗങ്ങളുടെ മനസ്സിൽ സ്വരൂപിക്കപ്പെട്ടു. ആ കുടുംബബന്ധങ്ങൾ താളം തെറ്റി. സമ്മിശ്ര വികാരങ്ങളിൽ കുടുംബം മുന്നോട്ട് പോകവേയാണ് അപ്രതീക്ഷിതമായി എബ്രഹാമിന്റെ മരണം അവിടെ നടന്നത്.

എന്നാൽ ദിവസങ്ങൾക്കുള്ളിൽ തന്നെ അപ്പന്റെ മരണം സ്വാഭാവികമല്ല അതൊരു കൊലപാതകമാണെന്ന് ഇലക്ട്ര തിരിച്ചറിയുന്നു. അപ്പനോട് എല്ലാ അംഗങ്ങളും തീവ്ര സ്നേഹത്തിലായിരുന്നെങ്കിലും അപ്പൻ വഞ്ചിക്കപ്പെടുകയായിരുന്നുവെന്ന തിരിച്ചറിവ് ഇലക്ട്രയെ കൂടുതൽ സംശയാലുവാക്കി. ആ മരണത്തിന്റെ ദുരൂഹതകളിലേക്ക് ഇലക്ട്ര ഇറങ്ങി തിരിച്ചു. ഇലക്ട്രയുടെ സഞ്ചാരവും തുടർന്നുള്ള പ്രതികാരവുമാണ് പിന്നീട് സിനിമ പറയുന്നത്.