شي جينپيڭ كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى، كۋبانىڭ مەملەكەت ءتوراعاسى دياس - كانەلمەن جۇڭگو مەن كۋبانىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 9 - ايدىڭ 28 - كۇنى، بەيجيڭ. 9 - ايدىڭ 28 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى، كۋبانىڭ مەملەكەت ءتوراعاسى دياس - كانەلمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: 65 جىلدىڭ الدىندا كۋبا باتىس جارتى شارداعى ەلدەردىڭ ىشىندە جاڭا جۇڭگومەن الدىمەن ديپلوماتيالىق قارىم - قاتىناس ورناتىپ، جۇڭگو - كۋبا قارىم - قاتىناسىنىڭ تىڭ پاراعىن اشتى. 65 جىلدان بەرى جۇڭگو - كۋبا قارىم - قاتىناسى ۇزدىكسىز ىشكەرىلەي دامىپ، سوتسياليستىك ەلدەردىڭ ىنتىماقتاسا سەلبەسۋىنىڭ، وركەندەپ كەلە جاتقان ەلدەردىڭ شىنايى ءوزارا كومەكتەسۋىنىڭ ۇلگىسىنە اينالدى. تاياۋ جىلداردان بەرى مەن ءتوراعا جولداسپەن تىعىز بايلانىس ورناتىپ، ەكى پارتيا مەن ەكى ەل اراسىنداعى قارىم - قاتىناستىڭ جاڭا دەڭگەيگە كوتەرىلۋىنە جەتەكشىلىك ەتتىك. تاياۋدا ءتوراعا جولداس جۇڭگوعا كەلىپ جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناستى، مەن سىزبەن تاعى دا كەزدەسىپ، اناعۇرلىم تىعىز جۇڭگو - كۋبا تاعدىرلاس ورتاق تۇلعاسىن قۇرۋ جونىندە ماڭىزدى ورتاق تانىمعا كەلدىم.

شي جينپيڭ بىلاي دەپ باسا دارىپتەدى: مەن جۇڭگو - كۋبا قارىم - قاتىناسىنىڭ دامۋىنا ايرىقشا ءمان بەرەمىن، سىزبەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعىن جاڭا باستاما ەتىپ، ءداستۇرلى دوستىقتى جالعاستىرىپ، جوعارى دەڭگەيلى ساياسي ءوزارا سەنىمدىلىكتى تەرەڭدەتىپ، دامۋ سەلبەستىگىن جۇيەلى ىلگەرىلەتىپ، جان - جاقتى ستراتەگيالىق سەلبەستىكتى كۇشەيتىپ، حالىقارالىق ادىلدىك پەن ادىلەتتىلىكتى بىرگە قورعاپ، جۇڭگو - كۋبا تاعدىرلاس ورتاق تۇلعاسى قۇرىلىسىنىڭ ۇزدىكسىز تىڭ تابىستارعا قول جەتكىزۋىن ىلگەرىلەتۋدى قالايمىن.

دياس - كانەل كۋبا توڭكەرىسىنىڭ باسشىسى راۋل گەنەرالمەن بىرلەسىپ قۇتتىقتاۋ تەلەگرامماسىن جولداپ مىنالاردى ءبىلدىردى: 60 نەشە جىلدان بەرى، كۋبا - جۇڭگو قارىم - قاتىناسى ۋاقىتتىڭ سىنىنان ءوتىپ، ءۇرتىس دامىدى. ەكى جاقتىڭ ساياسي سەنىمدىلىگى تەرەڭدەپ، سوتسياليستىك قۇرىلىستاعى تاجىريبە اۋىس - كۇيىسى جيىلەپ، ءداستۇرلى تۋىسقاندىق سۇيىسپەنشىلىگى مەن دوستىق سەلبەستىك قارىم - قاتىناسى ۇزدىكسىز بەكەمدەلدى. كۋبا جاق ءبىر جۇڭگو پرينسيبىنە تاباندى بولادى، سىرتقى كۇشتەردىڭ جۇڭگونىڭ ىشكى ىسىنە كيلىگۋىنە قارسى تۇرادى، كۋبا مەن جۇڭگونىڭ تاعدىرلاس ورتاق تۇلعاسى قۇرىلىسىن تاباندىلىقپەن ىلگەرىلەتۋدى قالايدى، زورەكەرلىككە قارسى تۇرادى.

سول كۇنى مەملەكەتتىك كەڭەستىڭ زۇڭليى لي چياڭ كۋبانىڭ زۇڭليى مارەرومەن ءوزارا قۇتتىقتاۋ تەلەگرامماسىن جولدادى. لي چياڭ مىنالاردى ءبىلدىردى: مەن زۇڭلي جولداسپەن تىعىز بايلانىستى ساقتاپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعىن وراي ەتىپ، ەكى ەل مەملەكەت باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، جوعارى دەڭگەيدەگى ساياسي سەنىمدىلىكتى ناقتى سەلبەستىك جەتىستىكتەرىنە ۇزدىكسىز اينالدىرىپ، جۇڭگو - كۋبا تاعدىرلاس ورتاق تۇلعاسىنىڭ مازمۇنىن ۇزدىكسىز بايىتۋدى قالايمىن. مارەرو مىنانى ءبىلدىردى: مەن سىزبەن بىرگە ەكى ەلدىڭ ەڭ جوعارى باسشىلارى كەلىسكەن ورتاق تانىمدى ءونىمدى تياناقتاندىرىپ، ەكى جاق ورتاق كوڭىل ءبولىپ وتىرعان ءار سالاداعى ەكى جاقتى سەلبەستىكتى تەرەڭدەتۋدى قالايمىن.