شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ قيمىلىنا قاتىناسقاننان كەيىن شي جينپيڭ بەيجيڭگە قايتتى

«حالىق گازەتى»، 9 - ايدىڭ 25 - كۇنى، ءۇرىمجى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ قيمىلىنا قاتىناسقاننان كەيىن 9 - ايدىڭ 25 - كۇنى ارناۋلى ۇشاقپەن بەيجيڭگە قايتتى. باس شۋجي شي جينپيڭنىڭ تاپسىرماسىمەن ۋاڭ حۋنيڭ ۇيىرمە باستىعى بولعان ورتالىق ۋاكىلدەر ۇيىرمەسى 9 - ايدىڭ 25 - كۇنىنەن 28 - كۇنىنە دەيىن شينجياڭنىڭ جەر - جەرىندە ءار ۇلت، ءار سالا كادر - جۇرتشىلىعىنان حال سۇرايدى.

شي جينپيڭ شينجياڭنان اتتاناردا ءار ۇلت بۇقاراسى ءۇرىمجى قالا رايونىنداعى جولدىڭ ەكى جاعىنا كەلىپ، قولدارىنا قىزىل تۋ ۇستاپ، باس شۋجيگە الاقايلاپ سالەمدەسىپ، باس شۋجيگە شىن جۇرەكتەن قۇرمەت ءبىلدىردى. ءۇرىمجى تيانشان حالىقارالىق اۋەجايىندا ۇلتتىق كيىم كيگەن ءار ۇلت بۇقاراسى ويناقى ءبي بيلەپ، شي جينپيڭ جولداستى ۇيىتقى ەتكەن پارتيا ورتالىق كوميتەتىنە دەگەن العىستى سەزىمىن بارىنشا بەينەلەپ، سوتسياليستىك وسىزاماندانعان شينجياڭ قۇرۋعا دەگەن بەرىك سەنىمىن ءبىلدىردى.

ساي چي، حى ليفىڭ، ۋاڭ شياۋحۇڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار سول ۇشاقپەن بىرگە قايتتى.