ءادىليا مينيسترلىگى پارتگرۋپپاسىنىڭ بۇرىنعى مۇشەسى، ورىنباسار مينيسترى ليۋ جىچياڭنىڭ پارا الۋ دەلوسىنا ءبىرىنشى سوتتا ۇكىم جاريالادى

شينحۋا اگەنتتىگىنىڭ 7 ـ ايدىڭ 22 ـ كۇنى حىفەيدان بەرگەن حابارى. 2025 ـ جىلى 7 ـ ايدىڭ 22 ـ كۇنى انحۇي ولكەسى ۋحۋ قالالىق ورتا دارەجەلى حالىق سوت مەكەمەسى 1 ـ سوتتا ءادىليا مينيسترلىگى پارتگرۋپپاسىنىڭ بۇرىنعى مۇشەسى، ورىنباسار مينيسترى ليۋ جىچياڭنىڭ پارا الۋ دەلوسىنا اشىق ۇكىم شىعارىپ، ايىپكەر ليۋ جىچياڭدى پارا الۋ قىلمىسى بويىنشا 13 جىلدىق مەرزىمدى قاماۋ جازاسىنا ۇكىم ەتتى، وعان قوسا 3 ميلليون يۋان اقشالاي ايىپ سالدى؛ دەلوعا الىنعان ليۋ جىچياڭنىڭ پاراعا العان مال - مۇلكى مەن ونىڭ ءوسىمى زاڭ بويىنشا مەملەكەت قازىناسىنا تاپسىرىلادى، جەتپەگەن بولەگى جالعاستى قۋزاپ قايتارىپ الىنادى.

تەكسەرۋ ارقىلى مىنالار انىقتالدى: 2007 - جىلدان 2024 – جىلى 4 - ايعا دەيىن ايىپكەر ليۋ جىچياڭ قوعام حاۋىپسىزدىگى مينيسترلىگى حالىقارالىق سەلبەستىك مەكەمەسىنىڭ باستىعى، چيڭحاي ولكەسىنىڭ ورىنباسار باستىعى، ولكەلىك قوعام حاۋىپسىزدىگى مەڭگەرمەسىنىڭ باستىعى، ءادىليا مينيسترلىگى پارتگرۋپپاسىنىڭ مۇشەسى، ورىنباسار مينيسترى، مەملەكەتتىك ەسىرتكىگە تيىم سالۋ كوميتەتىنىڭ مۇشەسى قاتارلى قىزمەت قولايلىلىعىنان جانە قىزمەت ۇقىعى، ورنى قالىپتاستىرعان قولايلى شارت - جاعدايدان پايدالانىپ، باسقالاردىڭ كاسىپورىن تيجاراتى، نىسانداردى كوتەرمەگە الۋ، كاسىپتى جالپىلاستىرۋ، قىزمەت مىندەتىن ءوسىرۋ قاتارلى ىستەرىنە كومەكتەسىپ تىكەلەي نەمەسە باسقالار ارقىلى قاتىستى ادامداردىڭ بەرگەن مال - مۇلكىن العان، حالىق اقشاسىنا سىندىرعاندا 42 ميلليون 450 مىڭ يۋاننان اسادى.

ۋحۋ قالالىق ورتا دارەجەلى حالىق سوت مەكەمەسى بىلاي دەپ قارادى: ايىپكەر ليۋ جىچياڭنىڭ ارەكەتى پارا الۋ قىلمىسىنا جاتادى، العان پارا سوماسى ەرەكشە كوپ، ونى زاڭ بويىنشا جازالاۋ كەرەك. ونىڭ دەلوعا كەلگەننەن كەيىن قىلمىسىن قاز - قالپىندا مويىنداپ، دەلو ءبىر جاقتى ەتۋ ورگانى ءالى يگەرمەگەن ءبىر ءبولىم پارا الۋ فاكتتەرىن ىرىقتىلىقپەن تاپسىرىپ، قىلمىسىن تانىپ، رايىنان قايتىپ، زاڭسىز ولجانى بەلسەنە قايتارعاندىعىن، دەلوعا ساياتىن زاڭسىز اقشا مەن زاڭسىز زاتتاردىڭ كوبى دەلوعا قايتارىلىپ بەرىلگەندىگىن، زاڭدا بەلگىلەنگەن، جاعدايعا قاراي جەڭىل جازالاۋ جاعدايى بار ەكەندىگىن، زاڭ بويىنشا وعان جەڭىل جازا بەرۋگە بولاتىندىعىن ەسكەرە وتىرىپ، سوت جوعارىداعى ۇكىمدى شىعاردى.

ۇعىسۋعا قاراعاندا، ۋحۋ قالالىق ورتا دارەجەلى حالىق سوت مەكەمەسى 2025 – جىلى 5 – ايدىڭ 9 - كۇنى بۇل دەلونى اشىق سوت اشىپ قاراعان. تەرگەۋ بارىسىندا، پروكۋراتۋرا ورگانى قاتىستى دالەل - ىسپاتتاردى كورسەتتى، ايىپكەر ليۋ جىچياڭ جانە ونىڭ اقتاۋشىسى فاكت كورسەتتى، ايىپتاۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، ليۋ جىچياڭ سوڭعى ءسوزىن سويلەدى ءارى سوت ۇستىندە قىلمىسىن مويىنداپ، رايىنان قايتقاندىعىن ءبىلدىردى. حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن جانە ءار سالا بۇقاراسىنان 30 نەشە ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى