شينجياڭ ۇيعۇر اۆتونوميالى رايوندىق پارتكومنىڭ بۇرىنعى ورىنباسار شۋجيى لي پىڭشيننىڭ پارا الۋ دەلوسىنا ءبىرىنشى سوتتا ۇكىم جاريالاندى

شينحۋا اگەنتتىگىنىڭ 4 ـ ايدىڭ 22 ـ كۇنى شي ـ اننان بەرگەن حابارى. 2025 ـ جىلى 4 ـ ايدىڭ 22 ـ كۇنى شانشي ولكەسى باۋجي قالالىق ورتا دارەجەلى حالىق سوت مەكەمەسى ءبىرىنشى سوتتا شينجياڭ ۇيعۇر اۆتونوميالى رايوندىق پارتكومنىڭ بۇرىنعى ورىنباسار شۋجيى لي پىڭشيننىڭ پارا الۋ دەلوسىنا اشىق ۇكىم شىعارىپ، ايىپكەر لي پىڭشيندى پارا الۋ قىلمىسى بويىنشا ءولىم جازاسىنا ۇكىم ەتىپ، 2 جىل كەشىكتىرىپ اتقارىپ، ساياسي ۇقىعىنان ومىرلىك ماحۇرىم ەتتى، وعان قوسا بارلىق جەكەلىك مال ـ مۇلكىن ءمۇسادىرالادى، ونىڭ ەكى جىل كەشىكتىرىپ اتقاراتىن ءولىم جازاسىنىڭ ۋاقىتى تولىپ زاڭ بويىنشا مەرزىمسىز قاماۋ جازاسىنا جەڭىلدەتىلگەننەن كەيىن، ومىرلىك قاماۋعا الىنادى، جازاسىن جەڭىلدەتۋگە، شارتتى بوساتۋعا بولمايدى؛ دەلوعا الىنعان لي پىڭشيننىڭ قىلمىس ارقىلى تاپقان مال - مۇلكى مەن ءوسىمى زاڭ بويىنشا مەملەكەت قازىناسىنا تاپسىرىلادى، جەتپەگەن بولەگى جالعاستى قۋزاپ قايتارىپ الىنادى.

تەكسەرۋ ارقىلى مىنالار انىقتالدى: 1999 - جىلدان 2023 - جىلعا دەيىن ايىپكەر لي پىڭشين چيڭحاي ولكەسى حايشي موڭعۇل - زاڭزۋ اۆتونوميالى وبلىستىق پارتكومنىڭ ورىنباسار شۋجيى، گولمۇت قالالىق پارتكومنىڭ شۋجيى، حايشي موڭعۇل - زاڭزۋ اۆتونوميالى وبلىستىق پارتكومنىڭ شۋجيى، چيڭحاي ولكەلىك پارتكومنىڭ تۇراقتى مۇشەسى، ساياسي - زاڭ كوميتەتىنىڭ شۋجيى، ىشكى موڭعۇل اۆتونوميالى رايوندىق پارتكومنىڭ تۇراقتى مۇشەسى، ۇيىمداستىرۋ ءبولىمىنىڭ باستىعى، شينجياڭ ۇيعۇر اۆتونوميالى رايوندىق پارتكومنىڭ ورىنباسار شۋجيى، چيڭحاي ولكەسىنىڭ ورىنباسار ولكە دارەجەلى كادرى قاتارلى قىزمەت قولايلىلىعى، سونداي - اق قىزمەت ۇقىعى نەمەسە ورنى قالىپتاستىرعان قولايلى شارت – جاعدايدان پايدالانىپ قاتىستى ورىندار مەن جەكەلەردىڭ كەن اشۋ، كاسىپورىن تيجاراتى، كادرلاردى مىندەتكە تاعايىنداۋ قاتارلى ىستەرىنە كومەكتەسكەن، تىكەلەي نەمەسە باسقالار ارقىلى جوعارىدا ايتىلعان ورىندار مەن جەكەلەردەن جيىنى 822 ميلليون يۋاننان استام مال – مۇلىكتى زاڭسىز قابىلداعان.

باۋجي قالالىق ورتا دارەجەلى حالىق سوت مەكەمەسى ايىپكەر لي پىڭشيننىڭ ارەكەتى پارا الۋ قىلمىسىنا جاتادى دەپ قارايدى. لي پىڭشيننىڭ العان پاراسىنىڭ سوماسى ەرەكشە كوپ، قىلمىس سالماعى ەرەكشە اۋىر، قوعامدىق ىقپالى ەرەكشە ناشار، مەملەكەت پەن حالىقتىڭ مۇددەسىنە ەرەكشە اۋىر زيان جەتكىزگەن، قىلمىسى بويىنشا ءولىم جازاسىنا ۇكىم ەتۋ كەرەك. لي پىڭشيننىڭ پارا الۋ قىلمىسىندا جۇزەگە اسپاعان جايتتەردىڭ بار ەكەنىن ەسكەرە وتىرىپ، دەلوعا الىنعاننان كەيىن قىلمىسىن قاز - قالپىندا مويىنداپ، دەلونى ءبىر جاقتى ەتۋ ورگانى ءالى يگەرە قويماعان پارا الۋ فاكتتەرىنىڭ باسىم كوپ ساندىسىن ىرىقتىلىقپەن تاپسىرىپ، قىلمىسىن تانىپ، وكىنەتىندىگىن بىلدىرگەن، زاڭسىز ولجانى بەلسەنە قايتارعان، پارا الۋدان تاپقان تابىسى مەن ءوسىمىنىڭ باسىم كوپ ساندىسىن دەلوعا قايتارعاندىعىن ەسكەرە وتىرىپ، زاڭدا بەلگىلەنگەن، جاعدايعا قاراي جەڭىل جازالاناتىن جايتتەر بار، وعان ءولىم جازاسى كەسىلىپ دەرەۋ اتقارىلمايدى. سونىمەن بىرگە، لي پىڭشيننىڭ قىلمىس فاكتى مەن جاعدايىنا نەگىزدەلىپ، ونىڭ ەكى جىل كەشىكتىرىپ اتقاراتىن ءولىم جازاسىنىڭ ۋاقىتى تولىپ زاڭ بويىنشا مەرزىمسىز قاماۋ جازاسىنا جەڭىلدەتىلگەننەن كەيىن، ومىرلىك قاماۋعا الىنادى، جازاسىن جەڭىلدەتۋگە، شارتتى بوساتۋعا بولمايدى؛ سوت جوعارىداعى ۇكىمدى شىعاردى.

كەلۋ قاينارى: حالىق تورابى