ا ق ش - تىڭ كاليفورنيا شتاتىنىڭ وڭتۇستىگىندەگى دالادا تۋىلعان ءورتتىڭ كەسىرىنەن 180 مىڭ ادام شەگىندىرىلدى

شينحۋا اگەنتتىگىنىڭ 1 – ايدىڭ 9 - كۇنى لوس – انجەلەستەن بەرگەن حابارى. ا ق ش – تىڭ كاليفورنيا شتاتىنىڭ وڭتۇستىگىندەگى لوس – انجەلەس رايونىنىڭ كوپ جەرىندەگى دالا ءورتى 1 – ايدىڭ 9 – كۇنى جالعاستى كۇشەيىپ، قازىرگە دەيىن از دەگەندە 5 ادام قازا بولدى، شامامەن 180 مىڭ تۇرعىن شەگىندى، نەشە مىڭداعان قۇرىلىس ويراندالدى.

كاليفورنيانىڭ ورمان شارۋاشىلىعى جانە ءورت ءوشىرۋ مەكەمەسىنىڭ 1 – ايدىڭ 9 - كۇنى تۇستەن بۇرىنعى ەڭ جاڭا حابارىنا قاراعاندا، لوس - انجەلەس رايونىندا قازىر 5 جەردە قاتەرلى دالا ءورتى ءورشىپ، جالپى ءورت كەتكەن اۋماق 117 شارشى كيلومەتردەن اسقان. مۇنىڭ ىشىندەگى ەڭ ۇلكەن ەكى دالا ءورتى لوس - انجەلەس اۋدانىنىڭ باتىس بولەگىندەگى تەڭىز جاعالاۋى الەۋمەتتىك اۋماعى پاشيفيك پالاسەس پەن لوس - انجەلەس اۋدانىنىڭ شىعىسىنداعى ارتادينادا رايونىندا.

ۇعىسۋعا قاراعاندا، وسى ەكى ورىنداعى ءورتتىڭ ءورت كەتكەن اۋماعى جەكە - جەكە 70 شارشى كيلومەتر جانە 40 شارشى كيلومەتردەن اسىپ، ءورت ءالى تىزگىندەلمەگەن. لوس – انجەلەس ءورت ءوشىرۋ مەكەمەسىنىڭ باستىعى كريستين كراۋلي 1 – ايدىڭ 9 - كۇنى بىلاي دەدى: پاشيفيك پالاسەس قالاسىندا تۋىلعان دالا ءورتىنىڭ كولەمى لوس - انجەلەس تاريحىنداعى "ءبۇلدىرۋ سيپاتى ەڭ كۇشتى" جاراتىلىستىق اپاتتاردىڭ ءبىرى.

اۋا رايى تاراۋلارىنىڭ مالىمەتىنە قاراعاندا، ءورت كەتكەن رايوندا 1 – ايدىڭ 9 - كۇنى كۇشتى جەل سوعىپ، ەڭ جوعارى جەل قارقىنى ساعاتىنا 100 كيلومەترگە تاياعان. قۇرعاق جانە بوراندى اۋا رايى، سونداي - اق جەل باعىتىنىڭ وزگەرىسى ءىشىنارا جەرلەردەگى ءورت اپاتىنىڭ قاتەرىن ارتتىرىپ، ءورتتى ورشىتە تۇسكەن.

دالا ورتىنەن شىققان قويۋ ىس - تۇتەك پەن كۇل لوس - انجەلەس رايونىنىڭ اۋاسىن اۋىر دارەجەدە لاستادى. لوس - انجەلەس رايونىنداعى كوپتەگەن وقۋ رايوندارىندارى ساباق توقتاتاتىندىعىن جاريالادى، 1 – ايدىڭ 9 - كۇنى لوس - انجەلەس پەن كورشىلەس رايونداردا 350 مىڭنان استام تۇتىنۋشىنىڭ توگى توقتادى. كاليفورنيا شتاتىنىڭ باستىعى نيۋسەن 1 – ايدىڭ 8 - كۇنى كاليفورنيا شتاتىنىڭ ا ق ش فەدەراتسيالىق شۇعىل ىستەردى باسقارۋ مەكەمەسى بەكىتكەن ءورت اپاتىن باسقارۋ كومەك قاراجاتىن الىپ، ءورت وشىرۋگە جۇمساعانىن جاريالادى.

كەلۋ قاينارى: حالىق تورابى