1947 -ൽ തൃശൂർ ജില്ലയിലെ വടക്കാഞ്ചേരിക്കടുത്തുള്ള കുണ്ടന്നൂരിലാണ് കെ എ.ശിവദാസ് ജനിച്ചത്. പ്രശസ്ത സംവിധായകൻ ജെ.ശശികുമാറിന്റെ സംവിധാന സഹായിയായിട്ടാണ് അദ്ദേഹം ചലച്ചിത്രലോകത്തേയ്ക്കെത്തുന്നത്. 1976 -ൽ ശശികുമാർ സംവിധാനം ചെയ്ത കായംകുളം കൊച്ചുണ്ണിയുടെ മകൻ എന്ന സിനിമയിലൂടെയായിരുന്നു തുടക്കം. അതിനുശേഷം പല സംവിധായകരുടേയും സിനിമകളിൽ സംവിധാന സഹായിയായി ശിവദാസ് പ്രവർത്തിച്ചു.
തുടർന്ന് ലജ്ജാവതി എന്ന സിനിമയിലൂടെ അസോസിയേറ്റ് സംവിധായകനായി. ആ സിനിമയിൽ അദ്ദേഹം ഒരു വേഷം അഭിനയിക്കുകയും ചെയ്തു. 1980 -ൽ വെടിക്കെട്ട് എന്ന സിനിമ സംവിധാനം ചെയ്തുകൊണ്ട് ശിവദാസ് സ്വതന്ത്ര സംവിധായകനായി. രാഷ്ട്രീയ നേതാവ് ആർ. ബാലകൃഷ്ണപിള്ള ഒരു മുഴുനീള കഥാപാത്രത്തെ അവതരിപ്പിച്ച ഏക ചിത്രം എന്ന പ്രത്യേകതയും ഇതിനുണ്ട്. അതിനുശേഷം 1981 -ൽ വേഷങ്ങൾ എന്ന ചിത്രവും അദ്ദേഹം സംവിധാനം ചെയ്തു.
ഏകദേശം നാലു പതിറ്റാണ്ടോളം സിനിമാരംഗത്ത് സജീവമായിരുന്ന കെ എ.ശിവദാസ് 2020 മാർച്ചിൽ അന്തരിച്ചു.
