മോഹൻ കുമാർ

കൊല്ലം ജില്ലയിലെ കരുനാഗപ്പള്ളി പടനായർകുളങ്ങരയിൽ 1951 -ൽ ജനിച്ചു. കൊല്ലം ഫാത്തിമ മാതാ കോളേജിൽ പഠിക്കുന്ന കാലത്താണ് മോഹൻ കുമാർ നാടകങ്ങളിൽ അഭിനയിച്ചു തുടങ്ങിയത്. രാഷ്ട്രീയ പിന്തുണയില്ലാതെ തന്നെ കോളേജ് യൂണിയൻ തിരഞ്ഞെടുപ്പിൽ ആർട്സ് ക്ലബ് സെക്രട്ടറിയായി തിരഞ്ഞെടുക്കപ്പെട്ട അദ്ദേഹം അക്കാലത്തുതന്നെ തന്റെ സംഘടനാപാടവം തെളിയിച്ചിരുന്നു.

ചങ്ങനാശ്ശേരി ഗീഥ, കെ.പി.എ.സി, പൂഞ്ഞാർ നവധാര, വെഞ്ഞാറമൂട് സൗപർണിക, ഒ. മാധവന്റെ കാളിദാസ കലാകേന്ദ്രം തുടങ്ങിയ പ്രമുഖ നാടക ട്രൂപ്പുകളിൽ അദ്ദേഹം പ്രവർത്തിച്ചു. 1979 -ൽ 'ശാപശില' എന്ന നാടകത്തിലൂടെയാണ് അദ്ദേഹം പ്രൊഫഷണൽ നാടക രംഗത്ത് അരങ്ങേറ്റം കുറിച്ചത്. തുടർന്ന് 1985 -ൽ 'ജനനി കലാമന്ദിർ' എന്ന പേരിൽ അദ്ദേഹം സ്വന്തമായി ഒരു നാടക ട്രൂപ്പ് ആരംഭിക്കുകയും 'ശ്രീരാമപുരത്ത് വാര്യർ', 'മുദ്ര', 'ചക്രവർത്തി', 'ചക്രം ഇവിടെ തിരിയുന്നു' തുടങ്ങിയ നിരവധി നാടകങ്ങൾ നിർമ്മിക്കുകയും ചെയ്തു.

1974 -ൽ ഇറങ്ങിയ ചക്രവാകം എന്ന സിനിമയിലൂടെയാണ് മോഹൻ കുമാർ ചലച്ചിത്ര അഭിനയരംഗത്തേക്കെത്തുന്നത്. തുടർന്ന് കണ്ണുകൾ, രാധ എന്ന പെൺകുട്ടി, എന്റെ സൂര്യപുത്രിയ്ക്ക്, തന്മാത്ര, നിവേദ്യം, ചട്ടമ്പിനാട്... എന്നിവയുൾപ്പെടെ പത്തിലധികം സിനിമകളിൽ അദ്ദേഹം അഭിനയിച്ചിട്ടുണ്ട്. മകൻ വിനു മോഹൻ നായകനായ നിവേദ്യത്തിൽ പ്രധാനപ്പെട്ട ഒരു വേഷത്തിൽ പിതാവായ മോഹൻ കുമാറും അഭിനയിച്ചിരുന്നു. കൂടാതെ നിരവധി ഡോക്യുമെന്ററികളിലും അദ്ദേഹം പ്രവർത്തിച്ചിട്ടുണ്ട്.

പ്രശസ്ത നടൻ കൊട്ടാരക്കര ശ്രീധരൻ നായരുടെ മകളും നടിയുമായ ശോഭ മോഹനാണ് മോഹൻ കുമാറിന്റെ ഭാര്യ. സിനിമാ നടന്മാരായ വിനു മോഹനും അനു മോഹനും ഇവരുടെ മക്കളാണ്. 2022 ഏപ്രിലിൽ മോഹൻ കുമാർ അന്തരിച്ചു.